So'l copagu na sanidá

http://www.lne.es/secciones/noticia.jsp?pRef=2008121600_46_707337__SOCIEDAD-Y-CULTURA-catedratico-Economicas-Carlos-Monasterio-favor-copago-Sanidad

De tola vida consideré que l'Estáu, en cualquiera los sos niveles de xestión, tien de garantiza-yos a los ciudadanos unos servicios sociales d'alcuerdu col principiu espresáu na nuesa costitución de que España ye "un estado social y de derecho" y d'alcuerdu colos drechos planteaos na mesma.

Nesa llínea sempre camenté que los más esenciales debieren ser la educación y la sanidá, dos servicios que, de xuru, nun deben tar suxetos a les veleidaes del mercau. Nun toy diciendo que nun debiera haber iniciativa privada n'esto, sinon que l'Estáu, que nos últimos trenta años fizo un enorme esfuerzu inversor nel desendolcu d'un sistema públicu de salú y educación, tien el deber de caltener y desendolcar aínda más esi sistema.

Nestos momentos de crisis económica, d'inestabilidá social por causes comu les pérdides de emplegos, l'aumentu los gastos familiares (por mor del endeudamientu xeneral y la subía los precios) ye cuando plantear la posibilidá que tengamos que pagar al médicu paez algo d'otru planeta. Los españoles acostumbrámonos dende fai ya munchu tiempu a tener munches coses gratis y, con ello y todo, a tomar una actitú de crítica y quexa continua. La sanidá, un los servicios sociales básicos, tresformase n'oxetu de munches d'estes crítiques ensin parar un momentu a pensar nel valor de poder dir al médicu o a l'hospital ensin preocupase de si lleves o non sueltu.

La primer vez que fui al médicu nos Estaos Xuníos foi pa poneme unes vacunes. Nun ye que nun tuviera vacunáu n'España sinon que nun tenía los xustificantes. Esto yera parte les normes pa entrar na Universidá ellí, por tantu taba obligáu a facelo y enriba d'eso tuve que pagar 10 dólares pela visita a la enferemera. Más tarde, mi compañera d'apartamentu púsose mala, llamó a la ambulancia y foi al hospital pa que la revisaran. No foi nada seriu: mediu díi n'obervación, unos análisis de sangre y una selmana dempués ... ¡5000 dólares de factura!. A Dios gracies teníamos seguru médicu colo que yo sólo tuve que pagar 10 dólares polos pinchazos obligáos y la mi amiga unos 50 dólares pol usu l'ambulancia, los análisis y la visita médica.

Naide nel su sanu xuiciu desearía un sistema asina. Los mesmos americanos busquen y rebusquen soluciones pa esi caos que tien a unos 45 millones de presones (la población entera d'España) a tar sin seguru médicu y a espenses de tener que pagar los totales de las facturas. Sicasi n'España hai dalgún que, por mor de criticar la sanidá pública, defiende algo paecío. Tamién hailos que pa xenerar una sanidá pública "más efectiva" privatizenla dende la premisa d'una "mejor gestión" (ahí tenemos la gran gestión los hospitales de Madrid o Valencia).

La realidá ye que'l nuesu sistema sanitariu nun pue sostenese per munchu tiempu ensin confrontanos con una reforma profunda. Esta reforma tien de pasar nun sólu por un emplegu más racional de los recursos, sinon tamién por xenerar una cultura de responsabilidá cívica del usu'l serviciu o del consumu de medicamentos. La responsabilidá les autoridaes tantu autonómiques (que tienen les competencies sanitaries) como a nivel nacional debe dirixise a una meyor xestión pública del sistema sanitariu.

El copagu, que los usuarios deban pagar una parte los servicios, nun ye sólu una forma de recaudar más, sinon una forma directa d'influir nes conciencies. Si todos y toes tuviéramos que pagar una cantidá, anque fuera irrisoria, cada vez que fueramos al médicu seguro o, dependiendo los ingresos (comu propón el artículu) que dellos xubilaos, y pre-xubilaos, que cobren pensiones altes (en munchos casos más que los sueldos de munchos) tengan que pagase les sos medicines, so tou aquelles que nun son parte d'un tratamientu o esenciales pa la so salúd nun me paez una idea tan mala.

Evidentemente, todos pagamos la sanidá pública a través de los nuesos impuestos pero nun vemos esi pagu y por ello nun somos munches veces coscientes de cuántu cuesta tolo que nos nun pagamos directamente. Asina, el copagu, amás de collaborar nel financiamientu la sanidá pue servir pa conciencianos y facer un usu más responsable de esos servicios que tenemos la suerte de disfrutar.