Falando güey con la mi parexa comente-y que iba a poneme cocinar carne guisada esta tarde. Díxome que taba fechu un "cocinites" y yo dixe-y que taba practicando pa prepara-y los mis platos cuando te de vuelta n'Asturies. Añadí que "no se-y ocurriera decir que la so ma facialo meyor, que si non, tiraba-y l'estofau a la cara". D'ehí entamamos a falar so les coses que les nueses mas o güeles faen meyor que naide: l'arroz con llechi la so güela, les tortilles de patates la mio ma, el corderu que prepara la suya o la sopa cocíu que preparaba la mi güela, ... eses coses fueron saliendo na conversación mentamu tratábamos de decidir cual yera la meyor cocinera.
Siempre camenté que la mio ma ye la meyor cocinera'l mundu, no question on that, peru nun ye mui buena en tresmitir los sos secretos de cocina a los demás, n'esi sentíu ye como un mal druida que conoz tolos secretos pero nun pue tresmitilos a la siguiente xeneración. Enantes de viaxar por primera vegada a los Estaos Xuníos, sentámonos los dos na mesa la cocina y entamó dicime les más importantes recetes pa que yo pudiera preparales na mio nueva vida americana. Sopes, carnes, llegumes, ... toles cosiquines de xintar que más me prestaben a mi.
Agora, más de tres años dempués, equí sigo cola mesma llibretina azul y les recetes la mi ma escrites en boli bic. Pero comu comentaba enantes, la mio ma nun tresmite mui bien sus artes, o yo nun las deprendo bien. Combino los ingredientes, busco el meyor timing pa intentar conseguir un sabor que se parezca n'algu al de la mio ma, pero na, nun hai manera conseguilo.
L'otru díi foi'l pollu al limón, güey ye la carne guisada. Taba siguiendo les instruciones, inclusu recapitulé con ella a través d'internet y confirmome los pasos a seguir. Nuevamente lo que resultó nun tien na que ver colo que debiera ser :(. Imaxino que eso se debe a que nun ye la so manu la que los añade y nunca conseguiré un sabor parecíu nes mis incursiones na cocina.
Toy n'un momentu de decisión, si d'esta salme mal, voy tener que entamar de pensar en buscar nuevas recetes que pueda facer y sepan riques aunque no sean les mis comides preferíes, a fin de cuentes ...
¡NAIDE COCINA COMO LA TU MA!
